بارزانی و وه‌فدێكی ئه‌مریكی هه‌وڵه‌كانی پێكهێنانی حكومه‌تی نوێی عیراقیان تاووتوێ كرد
وێستگه نیوز –
سه‌رۆكی پارتی دیموكراتی كوردستان و وه‌فدێكی ئه‌مریكی عیراقی بیروڕایان له‌باره‌ی عیراقی دوای هه‌ڵبژاردن و هه‌وڵه‌كان بۆ پێكهێنانی حكومه‌تی تازه و هاوكێشه‌كانی ناو عیراق ئاڵوگۆڕ كرد.
میدیاكانی پارتی دیموكراتی كوردستان بڵاویانكرده‌وه كه ئه‌مڕۆ چوارشه‌ممه 15ی ئابی 2018 مه‌سعود بارزانی سه‌رۆكی پارتی له سه‌ڵاحه‌دین پێشوازی له دۆگڵاس سڵێمان باڵیۆزی ئه‌مریكا له عیراق و ستیڤ فاگین كونسووڵی گشتیی ئه‌مریكا له هه‌ولێر كرد.
له دیداره‌كه‌دا بارودۆخی سیاسیی عیراق و ناوچه‌كه و پێشهاته تازه‌كان له‌سه‌ر ئاستی هه‌رێمایه‌تی و نێوده‌وڵه‌تی تاووتوێ كرا و باڵیۆزی ئه‌مریكا له عێراق ستراتیژیی وڵاته‌كه‌ی له‌باره‌ی دوا وێستگه‌كانی شه‌ڕی داعش و یارمه‌تیدانی ئاواره و پێكهاته‌كانی عیراق و گۆڕانكارییه هه‌رێمایه‌تییه‌كان بۆ بارزانی خسته‌ڕوو و ئاماژه‌شی به رۆڵی كاریگه‌ری ناوبراو و حكومه‌تی هه‌رێم له په‌نادان و پاراستنی پێكهاته و ئاواره‌كانی عیراق له شه‌ڕی تیرۆریستانی داعش دا.
له به‌شێكی تری ئه‌و كۆبوونه‌وه‌یه‌دا بیروڕا له‌باره‌ی عیراقی دوای هه‌ڵبژاردن و هه‌وڵه‌كان بۆ پێكهێنانی حكومه‌تی تازه و هاوكێشه‌كانی ناو عیراق ئاڵوگۆڕ كرا و بارزانی جه‌ختی له‌وه كرده‌وه كه "ئه‌وه‌ی به لای هه‌رێمی كوردستانه‌وه گرنگه به‌رنامه‌ی حكومه‌تی ئاینده‌ی عیراقه و پابه‌ندبوونی لایه‌نه‌كان به سێ پڕه‌نسیپی هاوبه‌شی له حوكمداری و ته‌وافوق له یاسادانان و هاوسه‌نگی له دامه‌زراوه‌كان ئه‌وله‌ویه‌تی سه‌ره‌كییه".
بارزانی وتیشی: "ره‌چاوكردنی ئه‌و سێ پڕه‌نسیپه ده‌بێته هۆی چاره‌كردنی زۆر له كێشه‌كان".
PM:04:57:15/08/2018
ئه‌م بابه‌ته 1764
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت